ترهيم قفل مركزي للهايلكس 2006 وفوق (للراكب)

بسم الله الرحمن الرحيم

السلام عليكم ورحمة الله وبركاته :

مشكلة يعاني منها الكثير وانا اولهم :> وتدور ببالي هالفكرة من زمان

ولكن ما فضيت لها الصراحة عاد يوم الله كتب وتيسرت الأمور

بديت ولا تكلفت يالله لك الحمد، ووالله ما تسوى تِمصّع المعزّبه كل 

مانزلت لمحل وهي معي تفتح لي وتقفل، تكلفة العمل تقريباً (30) ريال،

والمطلوب : مفتاح قفل مع الفيش كما هو واضح بالصورة حق كامري 2007 وفوق

 بـ 25 ريال و سلك شبكة من أقرب محل كمبيوتر المتر بـ 1.50 ريال ونص

 ونبدأ بالشرح على بركة الله :

. فحص الأسلاك من قفل السواق المركزي

. يوم شفت الشغلة متعبة لأن يبي لها تمديد من باب السواق لين باب الراكب

 نزلت عند العلبة اللي جنب الكلتش وفحصت الأسلاك

.لقيت الأسلاك وجرحتهن وسويت تمديد.

هن سلكين واحد للفتح وواحد للقفل (شرح البحث عن الأسلاك بنهاية الموضوع)

.بعد ما شبكت الأسلاك ومددت
(انتبه وانت تتعامل مع هالأسلاك لأنهن صغار بالحيل
وممكن بدال ما تجرح السلك تقطعه وابعد مسافة عن الفيش الرئيسي)

.وهنا احترت وين أركب الفيش لأن ما ودي اقص واخرب التخشيب

وشفت ان المكان هذا أنسب مكان، جنب الولاعة بأحد الفتحات

وكان عمق الفتحة كبير وعشان كذا قصيته بمنشار
عشان يطلع القفل ويكون بارز

مقارنة باللي جنبة

من الخلف- تركيب القفل المركزي والغراء (أبو جنّية) SuperGlue

وهذا شكلة من الأمام

وهنا تمديد الأسلاك للقفل (السلكين الخضر)

تركيب الأسلاك بالفيش (قفل+فتح) وواحد أرضي(أقرب مسمار)

بعد كبس الفيش بالمفتاح وتركيب الديكور

الشكل النهائي

الشكل النهائي من جهة ثانية

وهنا حبيت اسوي ديكور للشكل الخارجي

قصيت الزوائد والمقابض الي كانت مغطية الفتحات وفتحت لها من النص

مقاس المفتاح

وركبته هنا عشان تسكر الفتحات الي حوالين المفتاح

كان عندي فكرة قديمة مره بس توه تتيسّر للتنفيذ

فيه نكبة كبيرة اذا قفلت على المفتاح بالسيارة

ممكن تكون مسافر وممكن تكون بالبر وممكن تكون بعيد

هذا غير استغلال حقّين المفاتيح :>

الفكره اني احط فتح قفل بس خارجي برى السيارة ومخفي

بحيث انه اذا قفلت  على مفاتيحك تضغط الفاصل هذا ويفتح البيبان

سويتها الحمدلله وضبطت يارب لك الحمد والشكر

وطريقته : نفس سلك فتح الأبواب سو له تمديد خارجي وركب له

فاصل وسلك ماص وصلى الله وبارك :>

لكن الضحك بالموضوع وانا قاعد اشتغل واركب القفل المركزي للراكب

تحمست وفصخت ثوبي وبه كل مفاتيحي وحطيته بالمرتبة الي ورى

 وانا قاعد اهوجس بفكرة الفاصل الخارجي

ويوم خلصت قفلت على عفشي وبلشت :> لمين رحت لبيتي وجبت السبير.

وحطيت الفاصل هنا 

وش تدور يالحبيب..؟؟!!

قلت لك مخفي يعني بعلمك وينهوبه ؟؟؟؟

ههههههههههههه

إلى هنا انتهى الشرح بالصور

وباقي طريقة فحص الاسلاك كالتالي: بالنسبة لي عندي لمبة مركب عليها دبوس

وسلك للماص وبديت الامس الدبوس بالأسلاك الأساسية اللي من  الظفيرة عند الكلتش

-وللعلم هي مجموعة اسلاك للتحكم وقفل الدرايش ومن ضمنهن سلك القفل-

(المفروض انه تولع اللمبة اذا لامس سلك القفل) لكن بما إن القفل المركزي حسّاس

 بالحيل يصير كل ما لامست الدبوس بالسلك حق الفتح يفتح واذا بالسلك

 حق القفل يقفل، صار كأنه موصل يعني

أتمنى يكون الشرح وافي وأي استفسار انا حاضر.

أخوكم/ إحمود الخمبقاني (أبوفـهـد)

بسم الله الرحمن الرحيم

والصلاة والسلام على أشرف الأنبياء والمرسلين سيدنا محمد وعلى آله وصحبه أجمعين

أما بعد :.. فيسرني تقديم هذه المدونة لكل من يمتلك سيارة هايلكس الموديل القديم أو الحديث

وعرض أي ابتكار يخص هذه السيارة من نواقص يعلمها جميع ملاك هذه السيارة

أعزائي:هذه المدونة منكم وإليكم أنا فقط مؤسس وهي تحت تصرفكم في اي وقت شئتم

وأتقبل ملاحظاتكم بصدر رحب وأرجوكم أن لا تبخلوا علي بها

وسوف أقوم بإذن الله قريباً بإدراج المواضيع الخاصة بهذه السيارة سواء المنقول

أو المبتكر من قبل المتابعين وسوف أبدأ بإذن الله بعرض بعض تعديلاتي على هذه السيارة

مع كامل التحية والتقدير

أخوكم أبو فهد